❧ Lyon Jamet, à Marot
Suscription.
Va lettre, va, va t en à l’adventure
Droict à
Clement, et s’il en faict lecture,
Recorde toy de luy faire semonse
Joyeusement de te donner response.
Mais voyrement,
amy Clement,
Tout clerement, dys moy comment
Tant, et pourquoy tu te tiens coy
D’escrire à moy, qui suis à toy ?
T’ay je laissé par le passé,
T’ay je offensé, ou courroussé ?
Ay je à ton dict, et intendict,
En faict, ou dict, rien contredict ?
Ay je à ton nom, donné renom,
Autre que bon ? tu sçais que non :
Ny ne vouldroys, et ne sçaurois,
Tant sont tes droicts justes et droicts
Devant les yeulx de tous les Dieux,
Et demy Dieux, jeunes et vieulx.
J’atteste, et jure, et en rejure,
Qu’aucune injure, ou malle augure,
Nul laps de temps, ne lieux distans,
Escripts, lactens, ne vieulx Satans,
N’ont peu avoir force et povoir
De concevoir : c’est assavoir,
Un seul congé, qu’aye songé,
En son plongé, d’avoir changé,
Ne rien osté, de mon costé,
En loyaulté et feaulté
De nostre amour, par un seul tour,
Depuis le jour de ton retour.
Mais tant s’en fault, qu’un tel deffault,
En froit ou chault, ayt faict le sault
En mon pourpris, que n’ays repris,
Qui ne t’a pris, pour un grand prix.
Or donc,
amy,
de ton amy,
Que veulx tu dire ? Est ce pour rire,
Que de proscrire et interdire,
Une amour vieille ? O grand’ merveille !
Quand je sommeille, elle m’esveille,
Et dys ainsi : "Dieu qu’est ce cy ?
Cest homme icy, est il transy ?
Ses bons esprits, ses beaulx escripts
De si hault prix, sont ilz prescripts ?
Son cueur humain, tant pur et plain
De bon levain, changé de main
Auroit il bien, pour quelque bien
Qu’il se veoit sien ? Je n’en croy rien :
Car les effects, de ses beaulx faicts,
N’ont esté faicts, si contrefaicts.
Et quant et quant, il m’ayme tant
Que luy estant, bien mal contant,
Il ne sçauroit, quand il vouldroit,
Or qu’il eust droict, en mon endroit,
S’en ressentir, ne consentir,
Sans en mentir, à moy martyr ;
Car sçait il pas que tous noz pas,
Et tous noz cas, sont par compas
Comptez, nombrez et denombrez,
Puis obombrez, et adombrez ?
Si faict, si faict : bien il le sçait,
Le tout parfaict, bien luy a faict
Veoir et comprendre, et tant apprendre,
Qu’il en peult vendre et en espendre.
Et davantage, il est de l’aage,
Et du pellage, où l’homme est sage,
Ou jamais non. Et puis son nom,
D’estre tout bon, a le renom."
Or donc,
Clement, tout clerement,
Bien seurement et promptement,
Escripts pourquoy tu te tiens coy
De tenir loy, au
second toy,
Qui est icy, sans grand soucy,
La Dieu mercy, et toy aussi.
C’est à Ferrare, au huictiesme An
De la sienne proscription,
Mais à la tienne intention,
Que ce soit le dernier. Amen.